Feyzi Yalçin Di Qur´anê da gotinên kurdî hene?

Hin kes û der û dor dibêjin; nizanim çend hezar gotinên kurdî di Qur´an da hene. Ka em bi hev ra binêrin ku Xweda Te´ala çi dibêje. Lewra Qur´an kitêba Xwedê ye û Wî ji Pêxember ra daxistiye. Ji Xwedê baştir û qenctir kesekî bi Qur´anê nizane.

Xweda Te´ala di şeş ayetên Qur´ana pîroz da, ferman dike ku Wî Qur´an bi zimanê erebî daxistiye.

 

  • إِنَّا أَنْزَلْنَاهُ قُرْآنًا عَرَبِيًّا لَعَلَّكُمْ تَعْقِلُونَ

Me ew (kitêba vekirî)  Qur´anek bi (zimanê) erebî daxist ku hûn têbigihên-aqil bigirin. Yusuf:2

 

  • وَكَذَٰلِكَ أَنْزَلْنَاهُ قُرْآنًا عَرَبِيًّا

Bi vî awayî Me ew (kitêba ku tu xwarî tê da tune) Qur´anek bi (zimanê) erebî daxist. Taha: 113

 

  • قُرْآنًا عَرَبِيًّا غَيْرَ ذِي عِوَجٍ لَعَلَّهُمْ يَتَّقُونَ

(Ew) Qur´anek erebi ye û bêxwari ye, bihêviya ku (mirov) xwe pê (ji kufrê) biparêzin. Zumer: 28

 

  • كِتَابٌ فُصِّلَتْ آيَاتُهُ قُرْآنًا عَرَبِيًّا لِقَوْمٍ يَعْلَمُونَ

(Qur´an) Kitêbeka (wusaye ku) ayetên wê (ji aliyê Xweda va) hatine tefsîr-zelalkirin. Qur´anek erebiye ji bona qewmek ku jê fêhim bikin-aqil bistînin. Fusîlet: 3

 

  • وَكَذَٰلِكَ أَوْحَيْنَا إِلَيْكَ قُرْآنًا عَرَبِيًّا لِتُنْذِرَ أُمَّ الْقُرَىٰ وَمَنْ حَوْلَهَا

Bi vî awayî Me, Qur´an (bizimanê) erebî ji te ra wehî kiri, ku tu (bi wê) xelkê Mekkê û yên li hawurdorêne hişyar bikî… Şûra: 7

 

  • إِنَّا جَعَلْنَاهُ قُرْآنًا عَرَبِيًّا لَعَلَّكُمْ تَعْقِلُونَ

Me ew (kitêba vekirî) kir Qur´anek (bi zimanê) erebî ku hûn têbigihên-aqi bigirin. Zuxrûf: 2

Xweda ji kîjan qewmî ra, pêxember û kêtêb şandiye, bi zimanê wî millet û wî qewmî şandiye. Derbarê vê ya da, ayet heye. Lewra ne layîqê mezinatî û şanê Xwedatiyê ye; ku  tişta millet fêhm nake ji wan ra bişîne.

Gava Qur´an daketiy bi zimanê ku Qureyşiyan qisedikirin daketiye. Yanê hemû erebên wê demê, bi mena Qur´anê dizanibûn, an jî hayê wan ji têgehên Qur´anê hebûn.

Dibe ku di dirêjiya demê da, milletên cîranên hev, yên wekî ereb, kurd, faris, asûrî, keldanî, suryanî û îbriyan hin gotin ji hev girtibin, lê di wê demê da, Qur´an tenê bi zimanê erebî hatiye. Şeş ayetên li jor delîlên vê yekê ne.

Lê hin kes, der û dor rabûne dibêjin; nizanim çend hezar gotinên kurdî di Qur´anê da hene.

Di Qur´anê da gotinên kurdî an jî zimanek din hebe an tunebe, ne ji kurdî,  ne ji zimanên din ra û ne jî ji Qur´anê ra, ne şeref e û ne jî kêmasi ye. Lewra hemû ziman ji ayetên Xweda ne û zimanek ji yê din zêdetir nîne.

Heyra şîreta me ya biratiyê li we ew e; ku karê we bi tiştên wiha pûç û vala tune, gava hûn li ser Qur´anê xabatê dikin, bixwînin, fêhim bikin û di jiyana xwe da tetbîq bikin.

Tanê fêda vê xebatê ji we ra heye.

Feyzî Yalçîn 2016-11-13

Lämna ett svar

Pin It on Pinterest